開場前：三樣嘢一定要搞掂
- 1. 清空間 + 充滿電 — 三個鐘 4K 錄影閒閒哋食 40-60GB 同大半舊電。租我哋部機記憶卡已格式化；自己手機都清返夠位，方便散場過相。
- 2. 熟習長焦切換 — 綵排下由廣角 zoom 去長焦要撳邊度。開 show 先學，支歌完咗你仲搵緊個掣。
- 3. 校啱亮度鎖定 — 演唱會燈光忽明忽暗，學識長按畫面鎖定對焦／曝光（AE/AF Lock），主角面先唔會一時白一時黑。
vivo X300 Ultra 設定（追星長焦主力）
拍攝模式：優先用機內嘅舞台／演唱會拍攝模式（針對舞台燈光優化），想自己控制就用專業模式鎖 ISO 同快門。
錄影規格：4K 60fps 係穩陣之選。畫質增強類功能（AI 超清一類）會將片鎖喺 1080P，想要 4K 就唔好開；HDR／杜比視界會令色彩更濃，唔鍾意 AI 感可以關。
收音模式（vivo 演唱會收音選項）：想突出歌手把聲揀歌聲模式；想連現場大合唱同氣氛一齊錄揀氛圍模式；自己跟唱／講嘢想收得清就揀人聲模式。開場前試一次，中途唔好轉。
增距鏡：我哋套裝連 ZEISS 蔡司增距鏡（等效 400mm）—— 上鏡後畫面震動會放大，盡量搵欄杆／膊頭做依托，或者雙手夾實手肘貼身。
功能名稱以機內實際選項為準（唔同韌體版本叫法或有出入）。
Samsung S26 Ultra 設定
影相：5 倍光學（等效 115mm）係畫質甜點位；10 倍無損裁切都用得，再上嘅數碼 zoom 畫質開始跌，寧願影完裁相。
錄影：4K 60fps + 開盡防手震；長焦錄影同樣揾依托。
連拍：關鍵位（握手位、wave、encore）用連拍掃射，返去先揀 —— 好過一張一張賭。
實戰三招（乜機都用得）
- 反轉部機收音 — 手機收音孔一般喺機底，手一揸實好易冚住。錄影時試下反轉部機（鏡頭照樣對住舞台），收音即刻清好多，仲可以托住鏡頭更穩。
- 唔好成場錄 — 揀最想留低嘅三四首歌先錄 4K，其餘影相＋連拍。電量、容量、觀賞體驗三贏。
- 關閃光、關快門聲 — 尊重場地同鄰座，部分場次規則嚴，以主辦方現場指示為準。
散場後：過相 + 還機
你自己部手機都喺身邊，過相好簡單：AirDrop／Quick Share 即場過、返到屋企用 Google Photos 備份，或者傳輸線直接拉落電腦（4K 片建議用線，快好多）。
還機前確認備份晒 —— 我哋收機後會全機原廠重置，相片資料唔會保留，私隱有保障，但同時即係冇得補救，記得 check 多次。
仲未租機？
vivo X300 Ultra 連增距鏡（等效 400mm）／ S26 Ultra ／ 小米 17 Ultra，日租 $100、3 日 $300 啱一個演唱會週末，順豐送到。
相關閱讀：演唱會／追星拍攝場景攻略・買旗艦前先租嚟試